‘A CANARIA                                                                   

Esce ‘o sole… schiara ‘o juorno

e ‘a luna se fa janca ‘e scuorno.                                       

‘A luce se posa a manto ‘e seta

e saluta ‘a ggente ca se sceta.

Arriva chiano fino a nu puntone

e  trase dint’ ‘e lastre ‘e nu balcone.

Appesa a nu treppière na cajola,

cu dinto na canaria sola sola,

se veste ‘e chesta luce janca

ca sceta ‘sta canaria stanca.

Nu raggio ‘a tocca ‘e scelle

e essa se scerèa e se fa bella.

E’ cuntenta pe ‘stu ppoco ‘e sole

e abballano e cantanno se cunzòla.

Po’ se danna pecchè nun po’ asci’

e sbatte ’e scelle pe sse fa’ senti’.

Comm’è triste ‘a sciorta ‘e ‘sta criatura,

chiusa ‘nt’ a na gabbia pe sventura,

custretta a vvede’ sempe ‘e stessi ccose,

senza pute’ vula’ tra sciure ‘e rose.

Aspetta ‘o raggio ‘e sole d’ ‘o balcone

pe se sfrennesia’ cu na canzone.

Po’ aspetta ‘a sera ca fa scuro

e s’addorma sunnanno nu futuro.

Sonna comme po’ essere ‘a libbertà

si  quaccheruno ‘a venesse a libberà.

Ma rimane chiuso ‘stu spurtiello

e passa ‘o tiempo suojo cchiù bello.

Mo’… sta malata ‘sta canaria

e lle manca quase sempe ll’aria.

‘O padrone ‘a vulesse libera’…

Ma essa nun sape cchiù vula’.

A poco a vòta ha perzo ‘a voce

e ‘a voglia ‘e tutte ‘e ccose doce.

Sta murenno…e sonna n’ àta libertà:

chella ca nisciuno cchiù le po’ nega’ …

Fausto Marseglia